குமார சம்பவம் திரைவிமர்சனம்
ஹீரோ குமரன் வீட்டில் சமூகப்போராளி குமரவேல் மர்மமாக இறந்து கிடப்பது கதையின் தொடக்கம். குமரன் குடும்பமே சம்பவத்திற்கு காரணமாக இருக்கலாம் என சந்தேகிக்கும் போலீஸ் விசாரணையைத் தொடங்குகிறது. உண்மையில் குமரவேலைக் கொன்றது யார்? இயக்குநராக வேண்டும் என்ற குமரனின் கனவிற்கு என்ன நடந்தது? என்பதையே திரைக்கதை சுற்றுகிறது.
சீரியல் நடிகராக அறிமுகமாகியுள்ள குமரன், இயல்பான நடிப்புடன் சில இடங்களில் தனது உடல்மொழியால் ஒரு முன்னணி நடிகரைப் போல் நியாயப்படுத்துகிறார். காமெடியிலும் அவர் திறமையை வெளிப்படுத்தியுள்ளார். நாயகியும் தன் வேலையை சிறப்பாக நிறைவேற்றியுள்ளார். போராளியாக குமரவேல் வலிமையான நடிப்பை வெளிப்படுத்த, போராளிகளின் வாழ்க்கையை நுணுக்கமாகச் சித்தரிக்கிறார். மூத்த நடிகர் ஜி.எம். குமாரின் நடிப்பு படத்துக்கு பலமாக அமைந்துள்ளது. வினோத்சாகர் இரண்டாம் பாதியில் கலகல சிரிப்பை பரிமாறுகிறார். இன்ஸ்பெக்டர் கதாபாத்திரத்தில் சிவா, கவுண்டர் காட்சிகளில் பால சரவணன் – இருவரும் நன்றாக பொருந்தியுள்ளனர்.
அச்சு ராஜாமணியின் இசை ஓரளவு கேட்கக் கவரும் நிலையில் இருந்தாலும், பின்னணி இசை இன்னும் கூர்மையடையலாம். ஒளிப்பதிவாளர் கதையின் இயல்புடன் இணைந்த காட்சிகளைத் தந்துள்ளார். வசனங்களில் கிரேஸி மோகன் டச் இருப்பது படத்திற்கு கூடுதல் பலம் சேர்க்கிறது. முழுக்க முழுக்க நகைச்சுவை காட்சிகள் திரைப்படத்தைத் தாங்கிச் செல்கின்றன.
சுவாரஸ்யமான கதையை அழகான திரைக்கதை மூலம் சொல்லும் முயற்சியில், ‘குமார சம்பவம்’ பார்வையாளர்களை மகிழ்விக்கிறது. மொத்தத்தில் இது ஒரு ‘தரமான சம்பவம்’ என்பதில் ஐயமில்லை.
