இந்திரா திரைவிமர்சனம்
நடிகர்கள்: வசந்த் ரவி, சுனில், மெஹ்ரீன் பீர்சடா, அனிகா சுரேந்திரன், கல்யாண், ராஜ்குமார், சுமேஷ் மூர், கஜராஜ் மற்றும் பலர்.
ஒளிப்பதிவு: பிரபு ராகவ்
இசை: அஜ்மல் தக்ஷின்
எழுத்து – இயக்கம்: சபரீஷ் நந்தா
தயாரிப்பு:ஜேஎஸ்எம் மூவி புரொடக்ஷன்ஸ் மற்றும் எம்பரர் என்டர்டெயின்மென்ட் சார்பில் ஜாஃபர் சாதிக், இர்ஃபான் மாலிக்.
சஸ்பென்ஷனில் இருக்கும் ஒரு போலீஸ் அதிகாரியின் வாழ்க்கையை மையமாகக் கொண்டு உருவான “இந்திரா”, பார்வையாளரை கவரும் விதத்தில் பல வித்தியாசமான அம்சங்களுடன் திரைக்கதை நகர்கிறது.
குடிப்பழக்கத்தால் தனது கண் பார்வையை இழந்த போலீஸ் இன்ஸ்பெக்டர் இந்திரா (வசந்த் ரவி) மற்றும் அவரது மனைவி கயல் (மெஹ்ரீன் பீர்சடா) எதிர்கொள்ளும் சிக்கல்களைச் சித்தரிக்கிறது. இதே சமயத்தில், அபிமன்யு (சுனில்) என்ற சைக்கோ தொடர் கொலைகாரன், காவல்துறைக்கு சவாலாக மாறுகிறார். கயலின் கொலைக்குப் பின், மனவலி கொண்ட இந்திரா தனது நண்பரின் உதவியுடன் அபிமன்யுவை பிடிக்கிறார். ஆனால், விசாரணையின் போது எழும் அதிர்ச்சி தகவல் – உண்மையான கொலையாளி யார் என்ற கேள்வியை எழுப்புகிறது. இதன் பின்னணியில் நிகழும் உணர்ச்சிப்பூர்வமான திருப்பங்கள் தான் படத்தின் முக்கிய வலிமை.
வசந்த் ரவி தனது கதாபாத்திரத்தை முழு தீவிரத்துடன் ஏற்று நடித்துள்ளார். குறிப்பாக குருட்டுத்தன்மையை சித்தரிக்கும் அவரது நடிப்பு பாராட்டத்தக்கது. மெஹ்ரீன் பீர்சடா குறைந்த திரைப் பிரசன்னத்துடன் இருந்தாலும், தாக்கம் ஏற்படுத்தியுள்ளார். சைக்கோ கில்லராக சுனில் வித்தியாசமான நடிப்பை வெளிப்படுத்தியிருக்கிறார், ஆனால் அவரது கதாபாத்திர முடிவு சற்று திடீரென தோன்றுகிறது. அனிகா சுரேந்திரன் மற்றும் சுமேஷ் மூர் இருவரும் கதையின் திருப்புமுனைகளை வலுப்படுத்தும் விதமாக பிரமிப்பூட்டியுள்ளனர்.
ஒளிப்பதிவாளர் பிரபு ராகவ், க்ரைம் த்ரில்லருக்கேற்ற சாயலில் காட்சிகளை அமைத்துள்ளார். எடிட்டர் பிரவீன் முது, கதையை சீராக இணைத்து, சஸ்பென்ஸ் உணர்வை பேணியுள்ளார். ஸ்டண்ட் காட்சிகளில் விக்கியின் வேலை சிறப்பாக இருந்துள்ளது. அஜ்மல் தக்ஷின் இசை சராசரியாக இருந்தாலும், பின்னணி இசையின் அதிக சத்தம் வசனங்களை மறைத்துவிட்டது என்பது குறை.
சபரீஷ் நந்தா, சஸ்பென்ஷனில் இருக்கும் போலீஸ் அதிகாரி, தொடர் கொலைகள், பார்வையற்ற ஹீரோ என பல அம்சங்களை ஒன்றிணைத்து, அதிரடிக்குட்பட்ட புலனாய்வு த்ரில்லராக “இந்திரா”வை வடிவமைத்துள்ளார்.
“இந்திரா”, எதிர்பார்ப்பை மிகை செய்துள்ளது.
