பிளாக் கோல்ட் – திரைவிமர்சனம்
நடிகர்கள் : வெற்றி,பிரியாலயா, லிவிங்ஸ்டன், எ. வெங்கடேஷ்,அபிராமி வெங்கடாசலம், மற்றும் பலர்.
இசை :கவாஸ்கர் அவினாஷ்,
ஒளிப்பதிவு :சந்தோஷ் குமார் வீரசாமி,
இயக்கம் :தீரன் அருண் குமார்,
தயாரிப்பு : M. M ஸ்டூடியோஸ்.
வெற்றி கதையின் நாயகனாக நடித்திருக்கிறார். அவரது தந்தையாக வரும் லிவிங்ஸ்டன், ஒரு பிரபலமான தலைமுடி ஏற்றுமதி நிறுவனத்தில் ஓட்டுநராகப் பணிபுரிகிறார். அந்த நிறுவனத்தின் உரிமையாளராக ஏ. வெங்கடேஷ் நடித்திருக்கிறார். ஒரு காலத்தில் ஒரே நிறுவனத்தில் பணியாற்றியவர்களுக்கிடையே உருவாகும் தொழில் போட்டியும், அதனால் ஏற்படும் எதிர்பாராத பிரச்சினைகளும்தான் கதையின் முக்கியப் பின்னணி.
திருப்பதியிலிருந்து சுமார் ஐந்து கோடி ரூபாய் மதிப்புள்ள தலைமுடியை ஏற்றிக்கொண்டு வரும் சரக்கு வாகனம் வழியில் ஒரு மர்மக் கும்பலால் கடத்தப்படுகிறது. இந்தச் சம்பவத்தில் லிவிங்ஸ்டன் மீது திருட்டுப் பழி விழுகிறது. செய்யாத குற்றத்திற்காகத் தந்தை குற்றவாளியாக்கப்படுவதைப் பொறுத்துக்கொள்ள முடியாத வெற்றி, அவரை நிரபராதி என நிரூபிக்கக் களமிறங்குகிறார்.
உண்மையில் அந்த தலைமுடியைக் கடத்தியது யார்? லிவிங்ஸ்டன் இந்தப் பிரச்சினையிலிருந்து மீண்டாரா? கடத்தப்பட்ட தலைமுடி மீண்டும் கிடைத்ததா? தந்தை மீது விழுந்த பழியை வெற்றி துடைத்தாரா? இந்தக் கேள்விகளுக்கான பதில்களே படத்தின் மீதிக்கதை.
வெற்றி தனது கதாபாத்திரத்தின் தன்மையை உணர்ந்து சிறப்பான நடிப்பை வழங்கியிருக்கிறார். தந்தையை மீட்பதற்காகப் போராடும் மகனாக உணர்வுபூர்வமான காட்சிகளிலும், ஆக்ஷன் காட்சிகளிலும் கவனம் ஈர்க்கிறார்.
லிவிங்ஸ்டன் தனது அனுபவமிக்க நடிப்பால் கதாபாத்திரத்திற்கு வலுசேர்த்திருக்கிறார். அவரது மனைவியாக நடித்திருக்கும் துளசியின் நடிப்பும் படத்திற்கு கூடுதல் பலம். குடும்ப உணர்வுகளை வெளிப்படுத்தும் காட்சிகளில் அவர் சிறப்பாக நடித்திருக்கிறார்.
ஏ. வெங்கடேஷ் இந்தப் படத்தில் வலுவான எதிர்மறை கதாபாத்திரத்தில் தோன்றி கவனம் ஈர்க்கிறார். இவர்களுடன் கதையில் இடம்பெறும் மற்றொரு வில்லன் குழுவும் திரைக்கதைக்கு விறுவிறுப்பைக் கூட்டுகிறது.
நடன இயக்குநர் ஜப்பான் முக்கியமான கதாபாத்திரத்தில் நடித்திருப்பதும் குறிப்பிடத்தக்கது. அபிராமி வெங்கடாசலம், பிரியாலயா உள்ளிட்ட மற்ற நடிகர்களும் தங்களுக்குக் கொடுக்கப்பட்ட கதாபாத்திரங்களைச் சிறப்பாகக் கையாண்டிருக்கிறார்கள். ஒவ்வொரு கதாபாத்திரத்திற்கும் பொருத்தமான நடிகர்களைத் தேர்வு செய்திருப்பது படத்தின் பலங்களில் ஒன்று.
சந்தோஷ் குமார் வீரசாமியின் ஒளிப்பதிவு படத்தின் காட்சிகளுக்கு அழுத்தம் சேர்க்கிறது. குறிப்பாக திரில்லர் காட்சிகளின் பதற்றத்தையும், கதையின் வேகத்தையும் காட்சிப்படுத்தியிருக்கும் விதம் சிறப்பு.
கவாஸ்கர் அவினாஷின் இசையும் பின்னணி இசையும் படத்தின் பரபரப்பான தருணங்களுக்கு உறுதுணையாக இருக்கின்றன. தினேஷ் குமாரின் படத்தொகுப்பு கதையின் வேகத்திற்கு ஏற்ற வகையில் அமைந்திருக்கிறது. கலை இயக்கம், சண்டைக் காட்சிகள் மற்றும் இதர தொழில்நுட்பப் பணிகளும் படத்தின் உருவாக்கத் தரத்தை உயர்த்துகின்றன.
ஒரு சாதாரணமான பொருளாகப் பார்க்கப்படும் தலைமுடியை மையமாக வைத்து, அதன் பின்னணியில் இத்தனை பெரிய வணிக உலகமும் கடத்தல் சம்பவங்களும் இருக்க முடியும் என்பதை சுவாரஸ்யமான திரைக்கதையின் மூலம் சொல்லியிருக்கிறார் இயக்குநர் தீரன் அருண்குமார்.
புதுமையான கதைக்களம், கதாபாத்திரங்களின் தேர்வு, விறுவிறுப்பான காட்சிகள், நேர்த்தியான மேக்கிங் எனப் பல அம்சங்களில் தனது இயக்கத் திறமையை வெளிப்படுத்தியிருக்கிறார்.
முதல் படத்திலேயே வித்தியாசமான கதையைத் தேர்ந்தெடுத்து தயாரித்திருக்கும் தயாரிப்பாளர் எம். மூர்த்திக்கும் பாராட்டுகள். இந்தப் படம் அவருக்குத் திரையுலகில் நல்ல அடையாளத்தையும், வணிக ரீதியாகவும் வெற்றியையும் பெற்றுத் தரும் என்ற எதிர்பார்ப்பை ஏற்படுத்துகிறது.
மொத்தில் பிளாக் கோல்ட் வித்தியாசமான கதை கலம்.
