நூறு சாமி திரைவிமர்சனம்
நடிகர்கள்: விஜய் ஆண்டனி, சுவாசிக்கா ,கருணாஸ்,அஜய், சக்தி, பாலாஜி சக்திவேல்,மற்றும் பலர்.
இசை: பாலாஜி ஸ்ரீராம்,
ஒளிப்பதிவு: S. B.தர்ஷன் கிர்லோஸ்,
இயக்கம் :சசி,
தயாரிப்பு :விஜய் ஆண்டனி ஃபிலிம்ஸ் கார்ப்பரேஷன்.
நூறு சாமி கள்ளக்குறிச்சி கிராமத்தில் நடந்த ஒரு உண்மை சம்பவத்தை அடிப்படையாக வைத்து உருவாக்கப்பட்டது,இந்த படைப்பு. இளம் வயதிலேயே கணவனை இழக்கும் செல்வி (ஸ்வாசிகா), தனது இரண்டு மகன்களையே உலகமாகக் கொண்டு வாழ்க்கையை முன்னெடுக்கிறார். தனியாக வாழும் பெண் எதிர்கொள்ள வேண்டிய சமூக அழுத்தங்கள், பொருளாதாரப் போராட்டங்கள், மனரீதியான சவால்கள் என அனைத்தையும் கடந்து குழந்தைகளை வளர்க்கிறார்.
காலம் நகர, மகன்கள் வளர்ந்து தங்கள் வாழ்க்கைப் பாதையில் முன்னேறுகிறார்கள். ஒருகாலத்தில் தாயின் மறுமணத்திற்கு எதிராக இருந்த மூத்த மகன் பாஸ்கர் (அஜய்), பின்னர் தாயின் வாழ்க்கைக்கும் ஒரு துணை தேவை என்பதை உணர்கிறார். தாயின் எதிர்காலத்தைப் பற்றிய மகன்களின் அக்கறை, சமூகத்தின் பார்வை, ஒரு பெண்ணின் தனிப்பட்ட விருப்பம் ஆகியவை மோதிக்கொள்ளும் இடத்தில் கதை உணர்ச்சிகரமான திருப்பங்களை எடுக்கிறது. இதைப் பற்றி தன் உறவினர்களிடம் கூற அவர்களும் கடும் எதிர்ப்பை முன்வைக்கின்றார்கள் மற்றும் தன் ஊர் மக்களும் சேர்ந்து கொண்டே இப்படி ஒரு திருமண நடக்கக் கூடாது என்று அவர்கள் எதிர்ப்பு வலுப்பெறுகிறது, இத்தனை எதிர்ப்பு தாண்டி இறுதியில் மகன்கள் தன் தாய்க்கு திருமணம் நடத்தினார்களா இல்லையா என்பது தான் மீது கதை .
தமிழ் சினிமாவில் தாயை தெய்வமாக உயர்த்திப் பேசும் படங்கள் ஏராளம். ஆனால், ‘நூறு சாமி’ தாயை ஒரு மனிதராகப் பார்க்க வேண்டும் என்ற புதிய கோணத்தை முன்வைக்கிறது. ஒரு பெண் தாயாக இருப்பதற்கு முன் மனிதர்; அவருக்கும் ஆசைகள், உணர்வுகள், எதிர்பார்ப்புகள் உள்ளன என்பதை படம் தொடர்ந்து வலியுறுத்துகிறது.
படத்தின் மையக் கதாபாத்திரமாக வரும் ஸ்வாசிகா, தனது சிறப்பான நடிப்பை ஒன்றை வழங்கியிருக்கிறார். ஒரு விதவையின் வலி, அவமானம், பயம், நம்பிக்கை, மகிழ்ச்சி என பல பரிமாணங்களை மிகவும் இயல்பாக வெளிப்படுத்துகிறார். குறிப்பாக சில உணர்ச்சி வசப்பட்ட காட்சிகளில் அவரது நடிப்பு மனதைத் தொடுகிறது.
விஜய் ஆண்டனி திரையில் தோன்றும் தருணங்கள் கதைக்கு புதிய உயிரூட்டுகின்றன. வழக்கமான ஹீரோயிசத்தைத் தவிர்த்து, கதைக்குத் தேவையான அளவில் மட்டுமே தோன்றி தனது பாத்திரத்தை சிறப்பாக நிறைவேற்றியுள்ளார்.
அஜய் மற்றும் சக்தி இருவரும் மகன்களாக நம்ப வைக்கும் நடிப்பை வழங்கியுள்ளனர். தாயின் வாழ்க்கையைப் பற்றிய அவர்களின் மனப்போராட்டங்கள் இயல்பாக வெளிப்படுகின்றன.
பாலாஜி சக்திவேல் ஏற்றுள்ள எதிர்மறை கதாபாத்திரம் சமூகத்தில் இன்னும் நிலவும் பழமைவாத மனநிலையின் பிரதிநிதியாகத் திகழ்கிறது. அவரது நடிப்பு கதையின் தாக்கத்தை அதிகரிக்கிறது.
ஒளிப்பதிவும் பின்னணி இசையும் முக்கிய பங்கு வகிக்கின்றன. பாடல்கள் கதையின் ஓட்டத்தை பாதிக்காமல் பயணிக்கின்றன. குறிப்பாக வசனங்கள் பல இடங்களில் கைதட்டல்களைப் பெறுகின்றன. சில உரையாடல்கள் படம் முடிந்த பிறகும் நினைவில் நிற்கும் வகையில் அமைந்துள்ளன
இயக்குனர் சசி இந்த சமூகத்தில் பெண்களின் உரிமையை உணர்வுகளை வெளிப்படுத்தவே உருவாக்கப்பட்ட இந்த படம் நிச்சயமாக ஒரு பாராட்டப்பட வேண்டும் ஆனால் முதல் பாதையில் கொஞ்சம் மெதுவாக நகர்கிறது கொஞ்சம் நீளத்தை குறைத்து இருக்கலாம் தான் சொல்ல வந்த கருத்தை மிகவும் அழகாகவும் ஆழமாகவும் மக்கள் மனதில் பதிய வைக்கிறார் தன் பணியை சிறப்பாகவே செய்துள்ளார்
‘நூறு சாமி’ வெறும் குடும்பக் கதையோ, மறுமணத்தைப் பற்றிய படமோ அல்ல. பெண்களின் வாழ்க்கையை சமூகத்தின் பார்வையிலிருந்து அல்ல, அவர்களின் பார்வையிலிருந்து பார்க்க முயலும் ஒரு முக்கியமான திரைப்படம். தாய்மையைப் போற்றுவதோடு, அந்தத் தாயும் உணர்வுகள் கொண்ட மனிதர்தான் என்பதை நினைவூட்டுகிறது.
மொத்தத்தில் நூறு சாமி கணவன் இழந்த பெண்ணின் வலியும் உணர்வுகளையும் உணர்த்தும் படம்.
